Dál lea vuosttaš geardde go dát musihkkagilvu sáddejuvvo njuolgga NRK 1:s.
– Go máŋga čuođi gávttehasa čoahkkanit geahččat doaluid, de gal sámi kultuvra duođai galgá báitit, muitala NRK prošeaktajođiheaddji Ravna Nystad.
Artisttat juiget ja lávlot earret eará dálkkádaga birra, áldduid ja soga birra.
Dá leat lávlunoasi oasseváldit:
Natalie Carrion lea Upmis eret. Son lávlu vuohččan lullisámegillii, lávlagiin «Daelviejïjje».
Kárášjohkalaš Aili Kathrine Wergeland Teigmo lávlu «Bajimusas».
Ingá-Máret Gaup-Juuso lea suomabeal Sámis eret. Lávlaga namma lea «Dovdameahttumii».
Deatnulaš Ellinor Skartland joavkkuinis Soá searvá lávlagiin «Áiggi Mielde».
Mirja Palo lea ruoŧabeal Sámis eret, Johkamohkis. Su lávlaga namma lea «Hilla».
Joavku Elin & the Woods leaba Elin Kåven ja Robin Lynch, ja soai leaba guktii gilvalan MGP:as. Sunno lávlaga namma lea «Dát Vuovdi».
Dá leat juoiganoasi oasseváldit:
Iŋgor Ántte Áilu juoiggasta iežas boarraseamos áddjuba John Mathiasa.
Máhtte Ánte J. Sara juoiggasta iežas geasseorohaga, ja seammas gudnejahttá áldduid luđiin «Sildda áldu».
Inger Marie Nilut juoigá iežas vielja «Ovl' Ovl' Ovllá».
Johan Anders Bær juoigá olbmastis «Per Heimly/Heimly Piera».
Jörgen Stenberg lea boazosápmelaš ja son lea dahkan luođi dálkkadahkii ja lundui. Su luohti lea dan morraša birra go massá guohtuneatnamiid earret eará bieggamilluide. Luđiin Skilkedh.
Sara-Elvira Kuhmunen lea Johkamohkis eret. Su luođi namma lea «Čuvggodit».
Sámi Grand Prix oainnát NRK1 ja NRK TVs diibmu 19.50 beassášlávvordaga. Doalut leat Guovdageainnus Báktehárjjis cuoŋománu 16. beaivvi.
Illudatgo don Sámi Grand Prixai?
Juo, dieđusge 💖 83%
In, in beroš das 🙄 17%
Avstemningen er lukket. 260 stemmer totalt
